Мектепке дейінгі білім мекемелері музыка жетекшілерінің тәжірибе алмасуы

КАМАЛИЕВА Қ.К., ШҚО мәдениет, архивтер және құжаттама басқармасының «ШҚО балалар және жасөспірімдер кітапханасы» КММ-нің Ұлттық әдебиет және өлкетану орталығының кітапханашысы

      Баланы қоғамдық өмірде, еңбекте, табиғатта көркем өнерде бар әсемдікті сезіне білуге уйрету, тәрбиелеу маңыздылығы оның эстетикалық талғамы жоғары тұлға болып қалыптасуына ықпал етері сөзсіз.
      Жас ұрпақтың эстетикалық талғамын дамыту мынау – «жақсы, әдемі, ал, мынау – жаман, көріксіз» деп ауызша айтумен жүзеге асырылмайды, бала өнер шығармаларын түсініп, нәр алумен қатар табиғаттың өнердің, еңбектің, тұрмыстың, ән сазын, қолөнер шығармаларын танып білу, өзі жасау арқылы талғамы дамиды. Әрине, бұл жерде оқыту ісі ерекше роль атқарады.
      Мұндай оқыту тәжірибелерін жетілдіру мақсатында облыстық балалар және жасөспірімдер кітапханасында «Мектепке дейінгі тәрбие, білім беру мазмұнын жаңарту жағдайында музыкалық жетекшілердің кәсіби құзыреттіліктерін дамыту» тақырыбында болып өткен семинар-практикумның маңызы зор болды.
       «Өрлеу» БАҰО» акционерлік қоғамының филиалы Шығыс Қазақстан облысы бойынша педагогикалық қызметкерлердің біліктілігін арттыру институтының тыңдаушылары қатысқан семинар-практикумда ұсынылған іс-тәжірибелер әртүрлі формаларда жүргізіліп, музыка жетекшілерінің кәсіби біліктіліктерін арттыра түсті.

«Позитив толқынында» деп басталған тренинг қатысушылардың бір-бірімен және семинарды жүргізуші кітапханашылармен, яғни бізбен жақын етене танысуына зор ықпал етті. «Балабақшадағы ән-күй сабағы арқылы балалардың қабілетін арттыру» тақырыбын қозғаған аңдатпада қатысушылар бүлдіршіндерге музыкалық тәрбие берудің жолдарымен танысты.

      Балаларға тәрбие беру жолында ойынның маңызы зор екендігі белгілі. «Ұлттық өнер — құндылық көзі» деп аталған музыкалық-дидактикалық ойын бүлдіршіндерге қазақтың ұлттық аспаптары жайлы толық ақпарат беретін мағлұматтарға толы болды. Баланың қабылдау, тыңдау, есту қабілеттерін дамыта отырып, берілген ақпаратты бекіту үшін ұсынылған «Аспапты тап», «Әуенді тап» музыкалық-дидактикалық ойындарында қатысушылар белсенділік танытты.
      Ал «Әсемдік әлемінде» атты кіріктірілген сабағы мен «Асқақты елім-айбыным» атты шеберлік сыныбы бойынша ұсынылған сабақтар барысында музыкамен қатар, бейнелеу, технология, би үйрету пәндерінің сабақтастығы көрсетілді. Мұнда балалардың көркем әдебиет, музыка, бейнелеу, кескіндеу туындыларымен танысуына, әсемдік әлеміне саяхат жасауына, содан рахаттануына, түсіну, көру, сезіну талғамдарының қалыптасуына жол ашылады. Демек, баланың болашақтағы рухани дүниесінің баюына негіз болады. Балабақшадағы музыка жетекшілері эстетикалық тәрбиені кітап оқу, ән тыңдау, бейнелеу өнері мен театр, кино т.б. өнер түрлері арқылы көркем өнерге тарту, тағы басқа да жолдармен жүргізуге болатынын біліп қана қоймай, оны қалай жүзеге асыру тәсілдерін жан-жақты меңгеріп, жетілдіре түсті.
      Бүгінгі таңда балаларға арналған әндер қандай? Осы сұраққа жауапты қатысушылар «Әннің ғажайып әлемі» атты әуезді алаңқайдан тапты. Олардың өздері де бір сәт балалық шаққа саяхат жасап, балалар әндерін бірге шырқады.
      Семинар-практикумның нәтижелі өткендігін қатысушылардың «Қуаныш жапырақшаларына» кітапхананың ұлттық әдебиет және өлкетану орталығының қызметкерлеріне арнап жазған ізгі тілектерінен аңғардық.
      Баланың эстетикалық мәдениеті және белсенділігі тұтас педагогикалық процесте дамиды. Осы үрдіске кітапхана тарапынан біз де өз үлесімізді қосуға әрдайым әзірміз.