«Эбру» әдісімен суда сурет салу (Шеберлік сынып)

Касымова А.Т., «Аягөз қалалық №7 бөбекжай-балабақшасы» КМҚК-нің тәрбиешісі, Аягөз ауданы

Ұрпақ тәрбиесі басты назарға алынған бұл қоғамда баланың ой-өрісін, психологиясын бақылап отыру маңызды жұмыс. Оның мысалы арт терапияның түріне жататын «Эбру» су бетіне сурет салу әдісі.
Арт терапияның бұл түрі қауіпсіз әрі сақтықпен жасалады. Яғни қолына қылқалам ұстаған кез келген адам қиялға ерік беріп, төл туындысын жасап шығады. Сонымен қатар жеке шығармашылықты дамыту үшін де су арқылы қағаз бетіне түскен суреттің орны орасан зор. «Эбру» ішкі жан дүниеңізге терең бойлап, жаңа нәрсе ойлап табуға ықпалын тигізеді. Дүние жүзінде аталмыш өнерді «биші бояулар», «бұлт пен жел», «толқын тәрізді қағаз» деп те атайды.

«Эбрудың» шығуы жайлы әртүрлі дерек бар. Бұл өнердің нақты қай елден бастау алғаны белгісіз. Бірі – Үндістан, енді бірі – Парсы халқынан, кейбірі Бұхар хандығында, Шығыс елдерінен келген деседі. Оның қарыштап дамыған жері – Түркия. Сондықтан да Түркияны «эбрудың» отаны деуге толық негіз бар. Батыста көбіне «түрік қағазы» деп атайды. Елімізде бұл әдіс бірте-бірте қолданысқа еніп жатыр. Қызықты тәсілдің кеңінен таралуына бізде үлес қосып жүрміз. Су бетіне сурет салу әдісі баланың жан дүниесіне үңіліп, ішкі әлемінде болып жатқан жай-күйін жеткізе білуге ықпал етеді. «Эбру» баланы сурет салуға үйретпейді, керісінше сол арқылы қызығушылығын оятып, шығармашылығын дамытуға септігін тигізеді.