Мұғалімдерді эвалюциялау жүйесі осы саясаттың бір бөлігі болып табылады. ХХ ғасырдың басында бес арысымыздың бірі Ж.Аймауытов: «Сабақ беру – жай үйреншікті нәрсе емес, ол жаңадан жаңаны таба білу» десе, орыс педагогы А.Сухомлинский: «Сабақ – оқытушының педагогикалық мәдениетінің айнасы» деген пікірлері қазіргі таңдағы инновациялық білім беру талаптарының ұстанымдары іспеттес.

Ұлы ағылшын ағартушысы Уильям Уордтың: «Жай мұғалім хабарлайды, жақсы мұғалім түсіндіреді, керемет мұғалім көрсетеді, ұлы мұғалім шабыттандырады» немесе қытай философы Конфуцийдің: «Маған айтып берсең – ұмытып қалармын, көрсетсең – есімде сақтармын, өзіме жасатсаң — үйреніп алармын» деген ұстанымын басшылыққа ала отыра, «Орта білім беру мазмұнын жаңарту аясында біліктілікті арттыру» курсынан дәріс алу өзімді жаңа форматты ұстаз ретінде сезінуіме, жалпы білім берудегі ескі стереотиптерден батыл түрде арылуыма жағдай туғызды.

Курс барысында тренеріміз Жұпар Сахановнаның шеберлігінің арқасында сабақ берудің тиімді әдіс-тәсілдерін үйреніп, көптеген жаңалықтармен таныстым.

Сондықтан да, «Ескіден қол үзбей, жаңаға қол жеткізгендер ғана мұғалім бола алады» деген ұстанымды жадымызда сақтап, қандай істі болса да жаңадан бастау оңайға соқпайтынын, үлкен ізденіс барысында тиісті нәтижеге қол жеткізуге болатындығына көз жеткізе отыра, өзіңнен озған шәкірт тәрбиелеп, қоғам сұранысына сай білімді, шығармашыл, өзін-өзі дамытып, жетілдіре алатын маман дайындауға болатындығына көз жеткіздім. Бұл бағдарлама Қазақстан Республикасының білім беру жүйесіне үлкен өзгеріс әкеліп, әлемнің дамыған 30 елінің қатарына енуіне өз үлесін қосады деген сенімдемін.