Жаңартылған білімге – жаңаша көзқарас

АЗИМБАЕВ Н.,
Аягөз аудандық білім бөлімінің бастығы, Аягөз ауданы

Елбасымыз Н.Ә.Назарбаев – еліміздің алдына әлемнің дамыған 30 ел қатарына кіру міндетін қойды. Ел экономикасының қарқынды дамуы білім беру жүйесіне тікелей байланысты. Қоғамда азаматтар тек қана білім алып қоймай, ең маңыздысы – сол алған білімдерін күнделікті өмірде қолдана білуі бүгінгі күннің басты міндеттерінің бірі. Сол үшін оқушылардың функционалдық сауаттылығын арттырған жөн.
2016-2017 оқу жылынан бастап білім беру саласы жаңартылған білім беру бағдарламасына көшірілді. Қазір осы бағытта жұмыс қарқынды жүріп жатыр. Мұғалімдерді жан-жақты даярлау үшін мемлекеттік бюджеттен қаражат бөлініп, бастауыш сынып пәндері бойынша педагогикалық кадрлардың біліктілігін арттыру курстары ұйымдастырылуда.

«Өрлеу» БАҰО» АҚ филиалы ШҚО бойынша ПҚ БАИ Аягөз қаласында 2017 жылдың 27 ақпаны-17 наурыз аралығында 33 ұстазды қамтыған, біліктілікті арттыру курсын ұйымдастырды. Курс жетекшісі – «ТТжӘ» кафедрасының аға оқытушысы Жанузакова Н.А. өзінің білікті маман және талабы мен талғамы өте жоғары маман екендігін көрсете білді.
Жаңа бағдарламаның мақсаты – бастауыш сынып пәндері бойынша білім беру мазмұныны жаңарту және критериалды бағалау жүйесін енгізу тұрғысынан мұғалімдердің педагогикалық шеберлігін жетілдіру. Осы мақсатты меңгеру үшін тренер курс тыңдаушыларына сабақты модельдеу арқылы бағдарламаның материалдарын өз тәжірибесінде сынау, ой елегінен өткізу, рефлексия жасау, оқушыларға қолдау көрсетуге арналған жаттығулар мен тапсырмалар әзірлеуді үйретті. Түрлі қызықты тренингтер барысында практикалық зерттеулер, ықшам сабақтар беру, дәлелдеулер жүргізіліп, бағдарламаның тиімді жақтарын меңгертті. Бағдарлама құрылымы, мазмұны мен мақсаты, педагогикалық әдіс-тәсілдері егжей-тегжей талданды.

Курс барысында білім беру мазмұнын жаңарту бойынша қарым-қатынас дағдылары, белсенді оқу, зерттеуге негізделген оқу, сындарлы оқу-педагогикалық оқудың түрлі аспектілері қарастырылды. Ұстаздар осы жаңартылған білім беру бағдарламасын негізге алып, жоспарлауды меңгерді. Осындай біліктілікті арттыру курсын ұйымдастырып отырған «Өрлеу» БАҰО» АҚ филиалы ШҚО бойынша БАИ-да атқарылған үлкен еңбегі үшін аудан ұстаздарының алғысы шексіз.
Осы меңгерген білім негізінде ауданның әрбір ұстазы өз шәкірттерін жаңартылған білім беру бағдарламасы бойынша білім нәрімен сусындатқаны сөзсіз. «Ұстазы жақсының ұстанымы жақсы» дегендей Елбасының алға қойған міндетін іске асыру үшін ұстаздардың бар күшін салып еңбектенері хақ. «Білім негізі – бастауыш мектеп» екендігін басты назарда ұстаймыз.